Autokolona e presidentit ukrainas Volodymyr Zelensky, e cila ndodhej rreth 150 metra larg delegacionit grek të kryesuar nga kryeministri Kyriakos Mitsotakis, u sulmua nga një raketë ruse në Odesa.
“Ne jemi të gjithë mirë”, ka thënë për mediat greke ministri i shtetit Stavros Papastavrou, pjesë e misionit grek, që u organizua në kushte të fshehta ekstreme dhe ku përfshihen, përveç kryeministrit, 8 persona dhe sigurimi i tyre.
Mitsotakis ndodhet në Ukrainë në një vizitë dy ditore përpara se të shkonte në Bukuresht për Samitin e PPE dhe udhëtimi i tij u zhvillua në fshehtësi ekstreme për arsye sigurie.
Takimi mes Mitsotakis dhe Zelensky u zhvillua normalisht, ndërsa dy liderët do të mbajnë një konferencë për shtyp, e cila nuk do të transmetohet drejtpërdrejt për arsye sigurie.
