Ministri i Brendshëm, Saimir Tahiri ka vizituar në Spitalin e Traumës gazetarin Elvi Fundo, i cili u bë pre e një dhunimi fizik.
Në një prononcim për mediat në fund të vizitës, përveç se ka shprehur keqardhjen për ngjarjen, ministri i ka bërë thirrje opozitës që të mos e politizojë atë.
“I shpreha gjithë keqardhjen time për gjithçka ka ndodhur dhe e garantova, bashkë me drejtuesit e policisë, që do bëjmë maksimumin që kjo ngjarje të zbardhet dhe përgjegjësit të dalin para përgjegjësisë. Por do t’i bëja thirrje kujtdo, mbi të gjitha opozitës, që të ndalë një orë e më parë politizimin e kësaj historie”, ka thënë Tahiri.
Sipas ministrit të Brendshëm, nuk bëhet politikë dhe nuk fitohen vota duke politizuar çdo ngjarje në Shqipëri.
“E mira është që të bëhemi të gjithë bashkë për të garantuar që Shqipëria të bëhet një vend më i sigurtë dhe ku gjithëkush të ketë mundësi të ushtrojë profesionin e tij pa pasur asnjë problem dhe asnjë çështje shqetësuese”, ka thënë Tahiri.
Ai ka shtuar se, politizimi i panevojshëm i çdo situate nuk i shërben askujt.
“Të gjithë duhet të bëhemi bashkë, të inkurajojmë forcat e zbatimit të ligjit që të bëjnë gjithçka është e mundur për të çuar përpara drejtësisë ata që mbajnë përgjegjësi për këtë rast apo për cilin do rast tjetër”, ka shtuar Tahiri.
