Ish-ministri i Brendshëm, Saimir Tahiri ka hyrë në Prokurorinë për Krimet e Rënda, ashtu si pritej pak para orës 09:30.
Ish-ministri Tahiri shoqërohej vetëm nga avokati i tij, Maks Haxhia.
Thirrja e tij në organin e akuzës ka ardhur për t’i komunikuar atij masën shtrënguese që ka marrë ndaj tij gjykata për bllokimin e pasaportës dhe mos lejimin e tij të largohet nga Shqipëria.
Seanca do të mbahet në orën 9.30 në Gjykatën e Krimeve të Rënda nga gjyqtarja Liljana Baku, e cila është edhe gjyqtarja që ka shqyrtuar masën e sigurisë.
Kërkesa për thirrjen e Tahirit është bërë në bazë të nenit 248 të kodit të procedurës penale, ku gjykata brenda pesë ditësh thërret personin ndaj të cilit është dhenë masa për tia komunikuar.
Ndërkohë ish ministri do të shoqërohet edhe nga avokatët e tij mbrojtës, të cilët do të dorëzojnë edhe nje kërkesë për ndryshim të kësaj mase sigurie.
Në këtë seance përballë gjyqtares Baku, ish-ministri Tahiri do të duhet të përgjigjet për të gjitha çështjet që kanë dalë nga përgjimet e Habiljave dhe të dhënat e tjera të siguara nga Prokuroria e Krimeve të Rënda.
Kështu Tahiri do të pyetet për njohjet me O. S dhe lëvizjet me automjetin Audi, nëse i ka njohur Habilajt kur i ka takuar, apo akuzat se Tahiri ka përfituar dhurata nga Habilajt.
Emisioni Opinion, të enjten publikoi përgjimin e zbardhur, ku Moisi Habilaj dëgjohet të përmendë emrin e Saimirit dhe blerjen e dy byzylykëve, një për nënën dhe një për gruan e tij me vlerë 9 mijë euro.
Ndër të tjera flitet për mënyrën se si Ministri Saimir Tahiri u kishte lënë në përdorim makinën vëllezërve Habilaj.
Në vendimin e Gjykatës së Krimeve të Rënda, që i bllokoi pasaportën Saimir Tahirit, pjesë e argumenteve janë edhe disa përgjime të reja, që janë paraqitur si provë nga Prokuroria.
Në përgjimet e realizuara nga drejtësia italiane dhe që janë në dosjen prej 1800 faqesh, janë nënvizuar rastet kur përmendet ish-ministri i Brendshëm Saimir Tahiri.
Sipas materialit që është bërë publik nga organi i akuzës, personat e përgjuar e kanë përmendur sërish Saimir Tahirin duke thënë se ai nuk do para, por gjerdanë dhe diamante dhe, sipas tyre, Moisi Habilaj ka shpenzuar 15 mijë euro për një gjerdan që e ka blerë për bashkëshorten e Tahirit.
Në përgjime, personat e arrestuar në Itali flasin edhe për makinën “Audi A8” dhe mënyrën sesi u ble makina e Tahirit nga Artan Habilaj, që në fakt përdorej nga Moisi Habilaj, e cila sipas të përgjuarve është dhënë me mirëbesim me aq sa ka dashur Tahiri. Prokuroria ka shkëputur një bisedë të përgjuar mes Eneo Sulajt dhe një personi të paidentifikuar.
