TIRANË- Ministri i Brndshëm Saimir Tahiri ka dalë para mediave një ditë para ndeshjes Shqipëri-Serbi në Elbasan Arena. Ai garantoi se janë marrë masat nga policia por kërkoi edhe mirëkuptimin e qytetarëve. “Ndeshja e nesërme duhet të jetë një festë qytetarie, e denjë për Shqipërinë dhe për çdo qytetar shqiptar, këtu në vend apo jashtë Shqipërisë dhe sigurisht për Kombëtaren tonë”, u shpreh ai.
Kemi ne fokus kufijte, tha ministri i Brendshëm. “Është shkëmbyer informacion intensiv me partnerët në rajon dhe Bashkimin Europian për hartimin dhe monitorimin e listës së personave, të cilën kanë precedentë të mëparshëm për akte të dhunshme ose akte huliganizmi gjatë aktiviteteve sportive. Kjo listë, tani që flasim është në dispozicion të Policisë Kufitare dhe të të gjitha strukturave të Policisë së Shtetit në terren, për moslejimin e hyrjes në Republikën e Shqipërisë, e në rast se kanë hyrë më parë, apo jetojnë në vend, për monitorimin konstant dhe në të gjitha rastet, për ndalimin e hyrjes në mjediset e stadiumit Elbasan Arena dhe mjediset afër tij”.
Agjentë civilë do të jenë në të gjitha ambientet ku do të ketë grupime njerëzish dhe tifozësh, në akset rrugore, por edhe brenda stadiumit. “E gjithë struktura e Forcave të Ndërhyrjes së Shpejtë, RENEA dhe Njësia Antiterror, është angazhuar në gatishmëri të plotë që nga sot, për të parandaluar çdo kërcënim të prishjes së rendit publik”, tha më tej ministri i Brendshëm.
Me tej Tahiri tha se “janë marrë masat maksimale për garantimin e sigurisë edhe për ekipin mik. E në këtë kuadër, një pjesë e Repartit RENEA, bashkë me një pjesë të Policisë së Shtetit është e angazhuar ekskluzivisht për këtë qëllim“.
Në tërësi, për garantimin e ndeshjes do jenë të angazhuara mbi 2300 forca policie, kryesisht në Tiranë dhe Elbasan.
