Ministri i Brendshëm, Saimir Tahiri është i pari nga mazhoranca qeverisëse që flet për vdekjen e 17- vjeçarit, Ardit Gjoklaj në Sharrë. Në foltoren e Parlamentit, teksa replikonte me Sali Berishën, Tahiri u shpreh: “Ajo që ndodhi në Sharrë është fatkeqësi, vdekja e djalit të një polici. Ngjarja po hetohet. Më vjen keq për familjen e tij….”
Më tej Tahiri iu përgjigje ish-Kryeministrit Berisha për “Gërdecin”, pasi ky i fundit hoqi një paralele mes dy ngjarjeve: Shpërthimit në Gërdec dhe vdekjes në Sharrë, duke kërkuar që të dyja të njihen si vrasje shtetërore dhe kësisoj shteti të marrë përgjegjësitë.
“Po kush flet për vrasje shtetërore këtu? Kush? Këtu nuk ka më kufi. Njeriu që për Gërdecin thoshte se ishte një aksident teknologjik. Sot the se Gërdeci është vrasje shtetërore. Po si ka mundësi që ish-ministrin e Mbrojtjes e ka sot aleat, nuk u hetua?”, u shpreh Tahiri në replikë me Berishën.
Ndërsa do të shtonte: “Qenka vrasje shtetërore në Gërdec? Është ngjarje që duhet të hetohet nga fillimi deri në fund. Ai ka lënë pas 26 viktima, që i quajti ‘gabim teknologjik’. Nuk pranoj moral nga ky njeri që bën konferenca për shtyp bënte sikur se dinte si e kishte emrin baxhanaku i tij, ato që financon i biri i tij. Ai që flet për lirinë e mediave, ishte armiku i mediave, se i digjte redaksitë. A nuk u gjobit Top-Channel? Apo dhe gazeta “Tema”… Po ky ishit ju ‘dashnorët e fjalës së lirë’. Ku ishit ju? Askush nga ju nuk ka të drejtë që të bëjë moral për lirinë dhe të drejtat e medias”.
