Nga Dritan Laci
Është e pabesueshme ajo çfarë na panë sytë sot në aksidentin e ndodhur në fshatin Gosë të Kavajës, ku tre të rinj të cilin udhëtonin në një makinë të përbashkët, përfunduan në një kanal të thellë ujor.
Përpos pamjeve të rënda të nxjerrjes së trupave, ajo që akoma të rrënqeth mishin është ajo që pason gjithmonë në të tilla aksidente dhe që pak ose aspak i kushtojmë kujdes, sepse normalisht e gjithë vëmendja është e përqendruar te ngjarja dhe viktimat që ajo lë pas.
E pra sot të gjithë ishim dëshmitarë jo vetëm të një ngjarje të rëndë por edhe të rrënimit përfundimtar të ndihmës së shpejtë, që vetëm e tillë nuk meriton të quhet.
Siç edhe Opinion.al publikoi nëpërmjet videos që tregonte momentin e parë të nxjerrjes së makinës nga kanali dhe trupave që ndodheshin në të, gjithkush mund të shikojë se në çfarë katrahure është degdisur ndihma e shpejtë.
Një mjek që kërkon Tahirin të sjellë barrelën, por që Tahiri nuk duket gjëkundi.
Pastaj sakaq shfaqet barrela e cila do kishte qenë më mirë të mos kishte ardhur, se sa u dergj aty e braktisur në rrugë, se dreqi e di se kujt i hyn në punë ajo barrelë, në një ngjarje të tillë.
Dhe për ti vënë kapakun vjen më e pamendueshmja. Turpi i turpeve.
Dy burra, njëri i ndihmës së shpejtë, i veshur me gjysmëpërparësen e mjekut dhe xhinset e shëtitjes së bulevardit dhe një tjetër që shqyen viktimën prej krahësh, që tërheqin zvarrë trupin e pajetë pa e ditur edhe vetë se çfarë bëjnë dhe ku po e çojnë, me një batanije që nuk kishte ku ta kapje dhe ku ta lëshoje.
Më skandal se kaq nuk mund të ishte fundi i një shëndetësie e cila duket se ka marrë rrokopujën dhe s’ka kush tja ndalë turravrapin drej greminës ku është nisur.
Nëse nuk besoni shikoni vetë pamjet skandaloze se ku është katandisur sot shëndetësia shqiptare, ajo për të cilën u fol se do të jetë falas, dhe gjithsecili le të ngrejë një pikëpyetje në mendjen e tij: Ku po shkojmë dhe çfarë dreqin po duam të bëjmë?!
