Ministri Tahiri tha sot në “Top Story” se edhe po të kishte mundësi, kurrë nuk do t’i përgjonte aktorët e opozitës.
Duke iu përgjigjur Presidentit Nishani, që e cilësoi si lodër të SHQUP-it që merret me lodra, tha se ai nuk ka nevojë ta përgjojë Presidentin, as ish-kryeministrin Berisha dhe as Lulzim Bashën.
“Pse t’i përgjosh ata?! Pse ta përgjoj Presidentin, kujt i duhet? Po Berishën? Pse ta përgjoj? Ai në FB rri me qytetarin dixhital.
As Bashën s’kam arsye ta përgjoj. Vijnë vetë deputetët e PD-së në zyrën time dhe pak t’i gërricës i tregojnë të gjitha”, tha Tahiri.
Tahiri flet për pajisjen e përfolur: E kemi, ja për çfarë e përdorim
Ministri i Brendshëm, Saimir Tahiri ka folur sot në “Top Story” për pajisjen e shumëpërfolur nga opozita se përgjon zyrtarët në mënyrë të paligjshme.
Tahiri tha se Policia e Shtetit ka një pajisje të sjellë nga një mision italian, e cila vetëm identifikon numrat celularë në një zonë të caktuar, që janë nën përdorim.
Por sipas Tahirit, kjo pajisje, që kushton shumë, mbi 2 mln euro, nuk mund të përgjojë.
“Lidhur me të ashtuquajturën pajisje përgjimi, Ministria e Brendshme, çdo strukturë e Policisë së Shtetit, s’ka patur nuk ka dhe s’mund të ketë me ligj pajisje përgjimi.
Ka një të vërtetë tjetër, Policia me partnerët kryejnë trajnime që ndihmojnë Policinë e Shtetit në luftën kundër kriminalitetit.
Në bazë të një marrëveshje të vitit 2007, Policia e Shtetit me atë italiane zhvillojnë trajnime periodike me partnerët italiane.
Me kërkesën time ne kemi kërkuar që agjencitë ligjzbatuese në botë si FBI dhe DEA të kenë prezencë fizike në Shqipëri, të punojnë me zyra me Policinë tonë.
Në këtë pikë, në trajnim ka edhe një pajisje që vetëm dedekton numrat e telefonave celularë që bëhen në një zonë të caktuar.
Kjo është njësoj sikur të marrësh një numërator dhe të shohësh numrat e telefonit. Ndodh shpesh që Policia përdor pajisje të caktuara për të bllokuar thirrjet telefonike në zona të caktuara.
Kjo pajisje është në çdo polici të botës. Por ne nuk e kemi. Shpresoj shumë ta kemi një ditë, por është e shtrenjtë.
Kjo pajisje nuk përgjon, vetëm identifikon numrat që përdoren në një zonë të caktuar”, thotë ministri.
