Ministri i Punëve të Brendshme, Saimir Tahiri zbuloi detaje të reja nga gjykimi i drejtorit të Policisë së Shtetit, Haki Cako, duke ngritur akuza për mënjanimin e shortit të gjyqtarëve dhe caktimin e gjyqtarit Arjan Aliaj, për të përmbushur një vendim politik. Sipas ministrit Tahiri, gjyqtari Aliaj nuk ishte gjyqtar i gatshëm, por është caktuar në kundërshtim me ligjin.
“Dua të bëj me dije fakte skandaloze që dëshmojnë se si funksionon sistemi i drejtësisë në këtë vend, se si preferencat politike kthehen në vendime dhe se si tërhiqen gjyqtarët me pinca, ku ka nevojë që vendimi politik të shkojë deri në fund, për të ndalur rrugën tonë për të çuar përpara reformën e drejtësisë. Gjyqtari Arjan Aliaj që dha vendimin ndaj drejtorit Haki Cako nuk ishte i gatshëm, gjyqtari i gatshëm duhet të ishte Adriatik Bocaj. Shorti në fakt për çudi është mënjanuar dhe gjyqtari që ka marrë përsipër këtë çështje ishte gjyqtari Arjan Aliaj. Unë i drejtoj një pyetje KLD, unionit të gjyqtarëve, sindikatave të gjyqtarëve, presidentit e kujtdo që mund të japë një përgjigje për këto pyetje, për cilën arsye jashtë ligjit, jashtë shortit, u përzgjodh gjyqtari Aliaj për të dhënë vendimin për drejtorin Haki Cako? Për cilën arsye nuk u respektua ligji?” deklaroi ministri Tahiri. Duke iu referuar reagimit të KLDsë, që i cilësoi deklaratat e Tahirit si kërcënim të hapur jo vetëm për gjyqtarin Aliaj, por për të gjithë gjyqtarët, ministri tha: “Dua të përshëndes deklaratën e KLD, sipas meje një ndër deklaratat më të sinqerta të KLD në mbrojtje të gjyqtarit Aliaj. Sepse nuk besoj do kishte pasur mundësi që KLD të demaskohej në mënyrë kaq ekzemplare në mbrojtje të një gjyqtari që ka liruar vrasës, përdhunues. Përshëndes deklaratën e KLD për fytyrën e vërtetë që tregoi, duke mbrojtur një gjyqtar deri dje të shkarkuar.” Në akuzat e tij, ministri i Brendshëm përfshiu edhe Kreun e Gjykatës së Tiranës, i cili duhet të sqarojë sipas Tahirit, arsyet pse u mënjanua shorti. “Pyes kryegjyqtarin që njihet për lidhjet familjare me Berishën, me vajzën e tij Argita, Fatri Ismailaj e pyes për cilën arsye u mënjanua shorti dhe u shkel ligji dhe u lejua që çështjen ta gjykonte gjyqtari Arjan Aliaj”. Tahiri foli edhe për frontin e së keqes, aty ku sipas tij bëjnë pjesë edhe gjyqtarët me çekiç në dorë që duke mbajtur peng drejtësinë, mbajnë peng edhe Shqipërinë. “Unë kam disa konkluzione që dëshmojnë më së miri se çdo moment që hedhim dritë mbi këtë çështje, nxjerrim në pah skandal pas skandali, urdhra politikë për të goditur policinë se është në linjën e parë në luftën kundër krimit dhe korrupsionit. Ne jemi të vendosur të çojmë përpara axhendën më të rëndësishme, miratimit të reformës në drejtësi. Fronti i së keqes me çekiç në dorë dhe mbrojtje politike e korporatës së gjyqtarëve që mbajnë peng drejtësinë, po mbajnë sot peng Shqipërinë. Ne jemi të vendosur të miratojmë reformën të mos bëjmë pas nga askush që ndjehet sot i kërcënuar”, shtoi ministri.
