Ministri i Brendshëm i Kosovës, Xhelal Sveçla akuzoi Serbinë për përfshirje të drejtpërdrejtë në tensionet në veri të Kosovës dhe po hetonte mundësinë e përfshirjes ruse në sulmin që la të vdekur katër persona dhe tensionoi më tej marrëdhëniet mes Kosovës dhe Serbisë.
Sveçla tha për Associated Press në një intervistë se hetuesit po shikonin provat që lidhnin Rusinë, një aleate e Serbisë, me sulmin e armatosur.
Armët ruse, pajisje të tjera dhe dokumente që sugjerojnë përfshirjen ruse u zbuluan pas përleshjes me armë gjatë një dite, tha ai.
“Ajo çka e dimë sigurt është se sulmuesit erdhën nga Serbia. Disa prej tyre janë serbë të Kosovës, që kanë shtetësi të dyfishtë të Kosovës dhe Serbisë dhe sipas informacioneve nga inteligjenca jonë, ata ishin trajnuar në kampet në Serbi. Kemi gjetur disa dokumente që na bëjnë të dyshojmë se ka pasur individë nga Rusia po ashtu. Sa u përket pajisjeve, ne kemi dëshmi, por sa u përket individëve, ne ende kemi vetëm dyshime”, është shprehur Sveçla.
Një polic i Kosovës dhe tre persona të armatosur u vranë në sulmin e së dielës mes kryengritësve serbë dhe policisë së Kosovës. Fillimisht u arrestuan tetë persona, por katër prej tyre janë liruar nga paraburgimi për mungesë provash.
Në një nga konfrontimet më të rënda që nga shpallja e pavarësisë së Kosovës nga Serbia në vitin 2008, rreth 30 persona të maskuar hapën zjarr ndaj një patrulle policie pranë fshatit Banjska herët të dielën./Opinion.al
