Arben Dervishaj, supervizor i punimeve në inceneratorin e Fierit i është drejtuar Gjykatës së Lartë me rekurs. Dervishaj pretendon se nuk ekzistojnë kushtet dhe kriteret ligjore për t’u hetuar nën masën e sigurimit arrest në burg.
Ai kishte kërkuar disa herë ndryshim mase në dy shkallët e Gjykatës së Posaçme, por kërkesat e tij janë rrëzuar. Së fundmi, Arben Dervishaj ka pretenduar se për shkak të problemeve shëndetësore nuk mund të qëndrojë në qeli. Po ashtu, avokatët e tij bëjnë me dije se ai nuk ka rrezik për prishjen e provave, pasi çështja është në fazën e kalimit për gjykim.
Në dosjen e SPAK thuhej se Alqi Bllako së bashku me Arben Dervishajn, kanë udhëruar në drejtim të shtetit italian në Prill të 2019 për të parë ndeshjen mes Juventus dhe Ajaks së bashku me Klodian Zoton.
Ky i fundit ka bërë edhe pagesat e udhëtimit. Rezulton se biletat për të ndjekur ndeshjen e futbollit në stadium, kushtonin 1680 Euro. Sipas SPAK, Zoto po ashtu ka paguar edhe qëndrimin në hotel. Në dosje thuhet se në vitin 2017, Dervishaj ka udhëtuar për të parë një tjetër ndeshje në Itali ku pagesa është bërë po nga Klodian Zoto.
Prokuroria e Posaçme pretendon se këto udhëtime janë kryer në kohën kur Arben Dervishaj ishte caktuar me detyrën “Mbikqyresi i Punimeve tek Inceneratori i Fierit”.
SPAK i ka mbyllur hetimet për këtë çështje dhe e ka marrë të pandehur Arben Dervishajn së bashku me 19 persona të tjerë.
Çështja është në gjykatë, ku do të vendoset edhe fati i saj nëse kalon ose jo për gjykim.
Klan News
