Gjergji Muzaka nderon Tiranën. Një gol i realizuar në fund nga mesfushori 32-vjecar i mjaftoi skuadrës së Ilir Dajës për të mposhtur 1-0 Korabin në Selman Stërmasi. Fitorja e dytë rradhazi për bardheblutë që tashmë e shohin veten në kuotën e 10 pikëve në tabelën e klasfikimit po aq sa edhe Kukësi me dy skuadrat që ndajnë mes tyre vendin e dytë dhe 3-të në pritje të sfidës Laci-Partizani. Një fitore e merituar për Tiranën që në këtë ndeshje nuk kishte në anën e saj as fatin pasi goditi dy herë shtyllën. Rikthimi i tifozëve dibranë në shkallët e stadiumit nuk i mjaftoi Korabit që edhe pse ishte skuadra pritëse e luajti këtë ndeshje në shtëpinë e Tiranës.
Pak ndryshime në formacionet e të dyja skuadrave. Te Korabi Artan Mërgjyshi i besonte një fanellë titullari Nderim Nexhipit i cili ishte në mbështetje të sulmuesit të vetëm Sebino Plaku. Te Tirana vendin e dëmtuarit Ede në majën e sulmit e merrte talenti Majkëll Peci. Sinjali i parë në këtë sfidë ishte pikërisht i bardhebluve. Në minutën 13-të Afrim Taku provoi nga distanca por priti pa vështirësi Vujadinovic. Më kërkuese Tirana edhe gjatë minutave në vazhdim. Në të 20-tën fati nuk ishte me skuadrën e Ilir Dajës. Peci i shërbyer nga Taku bëri gjithcka në mënyrë të shkëlqyer në hyrje të zonës por goditja e tij potente u ndal nga shtylla. Në të 27-tën ishte Vujadinovic ai që i mohoi golin Asion Dajës me një pritje shumë të bukur. Në minutat e mbetura të pjesës së parë Korabi filloi ta hidhte më shumë vështrimin drejt portës së Ilion Likës dhe ishte pikërisht portieri i Tiranës ai që bëri mrekullinë ndaj Sebino Plakut në minutën e 35-të. Pjesa e parë nuk prodhoi raste të tjera për shënim ndërkohë që fraksion i dytë nisi me një tjetër rast të Korabit. Ishte Ilion Lika ai që i tha jo golit të skuadrës dibrane duke ndalur goditjen e Zguros në të 47-tën. 6 minuta më pas me Vujadinovic të mundur ishte traversa që i mohoi golin Tiranës. Spektakolar Afrim Taku në tentativën e tij nga distanca por fati nuk ishte me mesfushorin e bardhebluve pasi topi u stampua në traversë.
Në të 58-tën Peci i vetëm përballë Vujadinovic humbi një tjetër shans të artë për ti dhënë avantazhin Tiranës duke u neutralizuar nga portieri malazez i skuadrës dibrane. Në të 70-tën provoi edhe Gentian Muca nga larg por pa rrezik. Pak caste vonë futbollistët e Tiranës pretenduan për një 11-metërsh për një prekje të topit me dorë brenda zone nga Emiliano Cela por gjyqtari Kridens Meta e cilësoi si të pavullnetshme duke lejuar vazhdimin e lojës. Në të 77-tën Vujadinovic ishte sërish përcaktues me një pritje shumë të bukur. Në minutën 89 Sebino Plaku edhe pse lëvizi shumë mirë mes mbrojtëse të Tiranës goditi vetëm rrjetën e jashtme. Por atëherë kur të gjithë menduan se kjo sfidë do të mbyllej në një barazim pa gola, Gjergji Muzaka i ardhur në fushë nga stoli në minutën e parë shtesë realizoi një gol me peshë që i dha tre pikë shumë të rëndësishme Tiranës. Harkim perfekt i Takut me Muzakën që u zhyt me kokë si një bomber i vërtetë për fitoren e dytë rradhazi të Tiranës në këtë kampionat pas 4 barazimeve në 4 javët e para. Korabi nuk kishte kohë për të reaguar dhe në Selman Stërmasi u mbyll gjithcka me suksesin 0-1 të bardhebluve. /SS
