Sulmohet me molotov shtëpia e kryetarit të Gjykatës së Lartë në Greqi, plagoset efektivi i policisë

Persona ende të paidentifikuar kanë sulmuar pak pas mesnate shtëpinë e kreut të Gjykatës së Lartë, e vendosur në një zonë rezidenciale të Athinës.

Agresorët kanë hedhur sende të forta dhe bomba molotov në drejtim të banesës duke lënduar një efektiv policie që ishte në shërbim dhe shkatërruar makinën e patrullës.

Ai u transferua në Spitalin e Përgjithshëm Ushtarak 401 të Athinës, pasi kishte plagë në fytyrë dhe duar, por jashtë rrezikut për jetën.

Ndërhyrja e Zjarrfikësve ka qenë e nevojshme për shuarjen e zjarrit që ka rënë në automjet, ndërsa nga kontrollet e deritanishme në zonën e gjerë nuk janë arrestuar dhe as nuk janë identifikuar persona që mund të jenë lidhur me sulmin.

Zëdhënësi i qeverisë, Pavlos Marinakis reagoi menjëherë për këtë ngjarje dhe kërkoi që autorët të vendosen sa më shpejt përpara drejtësisë.

“Dënojmë pa mëdyshje aktin kriminal të sulmit me molotov në shtëpinë e kryetarit të Gjykatës së Lartë, ku u plagos edhe një polic. Republika jonë dhe shtyllat e saj, si Gjyqësori dhe zyrtarët e saj, nuk janë të frikësuar. Arrestimi i menjëhershëm i autorëve është prioritet absolut i autoriteteve. Policit të plagosur i urojmë shërim të shpejtë”, tha ai.