Ambasadorja e Kosovës në Shtetet e Bashkuara të Amerikës, Vlora Çitaku, ka reaguar pas sulmit në Serbi ndaj një autobusi me shqiptarë, i cili po kthehej nga Austria për në Kosovë.
Nga sulmi me gurë, përpos xhamit të autobusit “Bici Com”, që është thyer pas këtij sulmi, nuk raportohet të ketë pasur qytetarë të lënduar.
“Një autobus që po transportonte kosovarë është sulmuar sot në Serbi. Fatmirësisht, sipas raportimeve, askush s’është lënduar”, ka shkruar Çitaku në llogarinë e saj në Facebook, raporton Gazeta Express.
Çitaku ka shfrytëzuar rastin të thumbojë Serbinë, e cila është e prirë të alarmojë Këshillin e Sigurimit të Organizatës së Kombeve të Bashkuara dhe të zmadhojë problemet në vend.
“Ndoshta duhet të mbajmë një mbledhje të Këshillit të Sigurimit?!”, ka pyetur ajo, duke akuzuar serbët për hipokrizi dhe standard të dyfishtë.
“P.S. A e ka dënuar ndokush nga komuniteti ndërkombëtar këtë sulm”, ka pyetur Çitaku në Facebook.
