Veterani i luftës Esteban Santiago, i cili të premten me pistoletë hapi zjarr në aeroportin e Fort Lauderdale-Hollywood vrau pesë dhe plagosi tetë persona, kishte probleme mendore. Kjo sipas të afërmve dhe zyrtarëve të sigurisë.
Zëdhënësi i Gardës majori Paul Dahlen tha se 26-vjeçari Esteban Santiago ishte në Irak në vitin 2010, si pjesëtar i Gardës Kombëtare të Porto Rikos dhe se atje kaloi një vit me batalionin për inxhinieri.
Hernan Rivera, xhaxhai i të dyshuarit Santiago, ka thënë se kur ai u kthye nga Iraku, “nuk ndihej mirë”.
Në vitet e fundit, Santiago ka jetuar në Anchorage, Alaskë, konfirmoi për mediat amerikane, vëllai e tij Bryan Santiago. Ai shtoi se e dashura e vëllait të tij kohë më parë i ka njoftuar se Santiagos i duhet trajtim mjekësor.
Një zyrtar i policisë, i cili dëshiron të mbetet anonim, ka thënë se Santiago në nëntor të vitit të kaluar erdhi në zyrën e FBI-së në Anchorage, dhe u ankua se Shtetet e Bashkuara të Amerikës (SHBA) i kontrollojnë mendjen dhe se e detyrojnë të shikojë videot e DEASH-it.
I mbijetuari rrëfen si shpëtoi nga laptopi
Steve Frappier është një nga personat që përjetuan tmerrin e mbrëmjes së të premtes në aeroportin “Fort Lauderdale”, në Florida.
“Kur dëgjova të shtënat e para dhe njerëzit që bërtisnin që në aeroport ishte një person që qëllonte me armë, nuk u mendova gjatë por u shtriva në toke përmbys. Në shpinë kisha një çantë brenda së cilës ishte edhe laptopi im. Aty pranë pashë si një burrë u qëllua në kokë nga një plumb, u shokova. Në një moment dëgjova një goditje në shpinë, vetëm, kur gjithçka mbaroi kuptova se isha gjallë falë laptopit tim, i cili ishte bërë mburojë duke më shpëtuar jetën”, ka thënë Frappier, drejtor i Universitetit Westminster Schools, në Atlanta.
Ai tha se i dorëzoi policisë laptopin që ishte dëmtuar dhe aty brenda u gjet plumbi që mund t’i kishte marrë jetën 37-vjeçarit.
/Panorama
