Arrestohet nga policia Enea Bekteshi, pjesë e një grupi kriminal që vepron në këtë qytet.
Ai është vendosur në pranga për incidentin e regjistruar pak ditë më parë në Elbasan, ku u godit makina e zv/ drejtorit të Elbasanit.
Sipas të dhënave të para nga policia lokale, mësohet se ai është arrestuar në Cërrik dhe i është gjetur edhe një sasi lënde narkotike.
Bekteshi është i njohur si pjesëtar i bandës “Çela” në Elbasan dhe sipas të dhënave të para, mësohet se ai është arrestuar nga forcat operacionale të Policisë së Shtetit në bashkëpunim me Policinë e Elbasanit.
Kujtojmë se Suel Çela është akuzuar nga opozita si drejtues i një bande shumë të fuqishme në Elbasan, ku bën pjesë edhe i arrestuari i sotëm, Enea Bekteshi.
Dyshohet se Bektashi ishte në makinën e blinduar me Suel Çelën, kur goditën makinën e policisë më 18 shtator në Elbasan.
Kryeministri Edi Rama nga Fieri, sot, deklaroi se shumë shpejt do të ketë rezultate konkrete për atë çështje dhe shumë shpejtë do të ketë veprime të pandërprera të policisë së shtetit për të goditur organizatat kriminale dhe për të goditur të inkriminuarit brenda policisë së shtetit sepse në zona ku veprojnë këto lloj forcash ka inkriminim të policisë së shtetit.
Më herët, për krimin e organizuar në vend ka reaguar edhe ambasadori Donald Lu, ku theksoi se në Shqipëri ekzistojnë katër klane kryesore që drejtojnë 20 familje kriminale shqiptare dhe që dominojnë aktivitetet kriminale.
