Një sulm terrorist me armë zjarri dhe bombë shpërthyese u shënua mesditën e sotme në kompaninë e Mbrojtjes dhe Hapësirës ajrore të Turqisë, TUSAS.
Për ngjarjen ka reaguar edhe presidenti turk, Recep Tayyip Erdogan, i cili ka deklaruar se deri më tani janë 4 të vrarë dhe 14 të plagosur.
“Kemi 4 dëshmorë dhe 14 të plagosur. Dënoj këtë sulm të tmerrshëm terrorist dhe uroj mëshirën e Zotit për dëshmorët tanë”, tha Erdogan.
Në një deklaratë për shtyp, ministri i Punëve të Brendshme Ali Yerlikaya tha se bëhet fjalë për sulm terrorist dhe dy nga sulmuesit u vranë:
“Ndodhi një sulm terrorist kundër objekteve të TAI Ankara Kahramankazan. Fatkeqësisht, pas sulmit patëm dëshmorë dhe të plagosur.”
Mediat në Turqi bëjnë me dije se dy terroristët kanë marrë pengje dhe se gjatë sulmit ata qëllonin me armë çdo qytetar që u dilte para.
Nuk është e qartë se sa persona janë përfshirë në sulm dhe nëse ka të dyshuar të tjerë për t’u kapur.
