Pas mbledhjes së Këshillit të Sigurisë Kombëtare, Presidenti Ilir Meta shprehet se Shqipëria dënon sulmet ruse në Ukrainë, ndërsa tha se Shqipëria do të ndërmarr masa në koordinim me partnerët ndërkombëtar.
Meta tha se Shqipëria po i bën thirrje Rusisë të ndërpresë sulmet ushtarake në Ukrainë dhe të ulet në tryezën e dialogut.
“U diskutuan masat që do të ndërmerren në koordinim të plotë me partnerët tanë. Me këtë rast dënoj me ashpërsinë më të madhe sulmin e Rusisë kundër Ukrainës. Ky përshkallëzim përbën shkelje të rëndë të së drejtës ndërkombëtare, kartës së OKB dhe minon sigurinë dhe paqen. Si president shpreh dhimbje të thellë për jetët e humbura. Shpreh solidaritetin e plotë me popullin e Ukrainës. Shqipëria si anëtar i NATO i bashkohet thirrjeve ndaj Rusisë për të braktisur këtë rrugë të dhunës dhe të kthehet në rrugën e dialogut. Shqipëria do të zbatojë të gjitha angazhimet e marra në kuadër të politikës së jashtme“, tha Meta./ Opinion.al
