Dy kamikazët që shpërthyen një ditë më parë në aeroportin e Brukselit janë dy vëllezërit Khalid dhe Ibrahim El Bakraoui. Policia belge identifikoi dy vëllezërit me origjinë nga Peruja, pas këqyrjes së kamerave të sigurisë së aeroportit, të cilat kishin fiksuar tre terroristët në aeroport.
Dy vëllezërit El Bakraoui mbanin nga një dorezë të zezë në njërën dorë, për të fshehur detonatorin e lëndës eksplozive që kishin në trup. Ndërkohë, terroristi i tretë që duket në foton e shpërndarë nga policia dyshohet se është prodhuesi i bombave me gozhda, emri i të cilit ishte përfolur edhe gjatë sulmeve të 13 nëntorit në Paris. ADNja e tij u gjet në disa rripa me eksploziv të pashpërthyera, që u gjetën në teatrin Bataclan dhe në stadiumin e Parisit, pas sulmeve të përgjakshme. Terroristi i tretë, i cili mendohet se ka prodhuar bombat, i identifikuar si Najim Laachraoui është shpallur në kërkim nga policia, pasi ai nuk ka shpërthyer në aeroportin Zaventem.
Sipas hetuesve, tre terroristët kishin mbërritur në aeroport me tre makina të ndryshme, një taksi, një “Renault clio” të zezë dhe një “Audi S4” të zezë.
Taksisti që shoqëroi njërin prej kamikazëve në aeroport i tregoi policisë për adresën ku e kishte marrë terroristin. Taksisti rrëfeu se ishte habitur kur kishte parë numrin e valixheve që ai kishte me vete, duke e bindur të linte diçka në shtëpi, pasi nuk mund të ngarkoheshin në makinë.
Falë dëshmisë së taksistit, policia bastisi banesën ku kishin qëndruar kamikazët dhe gjeti brenda saj një bombë me gozhda, disa produkte kimike dhe një flamur të ISIS.
Sipas prokurorëve belgë, dy vëllezërit kamikazë i shpëtuan operacionit antiterrorizëm pak ditë më parë në Forest të Belgjikës. Khalid dhe Ibrahim el Bakraoui ishin dy emra të njohur për policinë belge, edhe për krime që nuk kishin të bënin me terrorizmin.
