António Guterres, Sekretari i Përgjithshëm i Kombeve të Bashkuara ka deklaruar se është “thellësisht i alarmuar nga përdorimi i forcës nga Shtetet e Bashkuara kundër Iranit”.
Sulmet e Uashingtonit ndaj objekteve bërthamore të Iranit, ai i konsideroi “një përshkallëzim të rrezikshëm në një rajon që tashmë është në buzë të tensioneve dhe një kërcënim të drejtpërdrejtë për paqen e sigurinë ndërkombëtare”.
Ai gjithashtu paralajmëroi për një rrezik në rritje që konflikti të dalë shpejt jashtë kontrollit, sipaas tij, me pasoja katastrofike për civilët, rajonin dhe botën.
Guterres u bëri thirrje shteteve anëtare të OKB-së që të ulin tensionet dhe të përmbushin detyrimet e tyre sipas Kartës së OKB-së, si edhe rregullave të tjera të së drejtës ndërkombëtare.
“Në këtë orë të rrezikshme”, shtoi Guterres, “është thelbësore të shmanget një spirale kaosi. Nuk ka zgjidhje ushtarake. E vetmja rrugë përpara është diplomacia. E vetmja shpresë është paqja.”
