Koordinatori Kombëtar i Luftës Kundër Ekstremizmit tregoi dje hetimet që u kryen derisa u zbuluan 3 personat e dyshuar për një sulm të mundshëm në stadiumin e Shkodrës gjatë ndeshjes me Izraelin.
Ndërsa pranoi se ka pasur një rrezik real, por për rastin e ndeshjes nuk ka pasur pritshmëri të një alarmi paraprak. Agron Sojati, i cili më herët ka qenë drejtues i strukturave të Antiterrorit, konfirmoi se në luftën në Siri dhe Irak janë vrarë 23 shqiptarë dhe 40 janë kthyer.
I ftuar në emisionin “Opinion”, në televizionin “News 24”, Sojati tha se stadiumi “Elbasan Arena” i ka kaluar të gjitha testet e sigurisë dhe nuk duhet përhapur panik.
A është e rrezikuar Shqipëria nga aktet terroriste?
Kam përshtypjen se Shqipëria gjendet në atë situatë që ka qenë për sa i përket rrezikut të një sulmi të mundshëm terrorist. Një ndeshje futbolli, pavarësisht nga axhenda, nuk e rrit shkallën e rrezikut, po flasim në nivel kombëtar apo rajonal. Nuk përjashtohet mundësia që individë apo grupe ta përdorin, qoftë edhe një ndeshje futbolli. Kjo thjesht për faktin se është një ndeshje me axhendë. Pra, dihet paraprakisht kush dhe ku. Kjo e bën më të lehtë mendimin e kujtdo që mund të marrë iniciativa të krijojë një ngacmim apo një sulm. Të themi që Shqipëria është vend imun dhe e ka kaluar këtë fazë nuk e themi pasi nuk flitet për imunitet. Pra, Shqipëria rrezikohet nga terrori dhe kjo është shprehur në të gjitha dokumentet e strategjisë për sigurinë për antiterrorin, që është miratuar në 2014-n, apo strategjinë për ekstremizmin, që është miratuar në 2015-n. Ne kemi një prezencë të hershme dhe po themi me potencë për sa i përket raportit të popullsisë, apo të peshës gjeopolitike që kemi, në të gjitha këto organizmat që janë angazhuar dhe janë në frontin e luftës kundër terrorit. Mjafton kaq për të thënë që Shqipëria nuk bën përjashtim.
Arrestimet që janë bërë së fundmi, a kanë pasur një bazë të mirëfilltë?
Absolutisht. Pa rënë në interpretim politik, nuk bëhet asnjë veprim policor pa u mbështetur në një procedurë penale. Pa pasur një miratim nga prokurori apo një vendim nga Gjykata. Kjo është tejkaluar në Shqipëri prej vitesh. Unë vetë kam pasur fatin të drejtoj struktura dhe jam shumë familjar me procedurën. Problemi është se ka gjithmonë dëshirë për informacion të detajuar të dorës së parë ndoshta dhe gjatë kohës që zhvillohen procedura të tjera hetimore. Fakti që nuk mbushet vakumi apo nevoja për informacion, duket sikur vihet në pikëpyetje edhe çështja e legjitimitetit të veprimeve, por unë për këtë jam fare i qartë se në çfarë niveli është hetimi, pastaj janë të tjera struktura që merren me këtë pjesë, por absolutisht që nuk bëhet asnjë lloj veprimi pa pasur një bazë të qenësishme.
Pra, ka elemente të qarta dhe rreziku ka qenë real?
Kam bindjen absolute që ka.
Kjo ka qenë një përpjekje për të bërë një goditje në Shqipëri, që të tërhiqte vëmendjen ndërkombëtare, apo jo? Jo thjesht goditje të Shqipërisë, por shfrytëzimi i mbërritjes së ekipit të Izraelit, çka dihet se do të shkaktonte menjëherë një lajm shumë të madh ndërkombëtar. Sa të varur jemi ne nga bashkëpunimi me partnerët për të zbuluar në kohë sulme të tilla?
Në çdo fenomen, nuk besoj se jo Shqipëria, po asnjë vend, sado resurse të ketë, nuk mund të mendojë se ka parasysh të gjithë hartën e aktiviteteve, që të jetë në gjendje për të thënë se kush janë kapacitetet. Fakti është që Shqipëria ka treguar se deri më sot ka pasur kapacitete të parandalimit të aktiviteteve apo akteve të terrorit. Ne kemi treguar se jemi në gjendje të ofrojmë siguri dhe garanci, por nuk flitet në terma absolutë asnjëherë. Personalisht nuk mendoj se grupi, kushdo të ketë qenë, pavarësisht veprimeve që janë bërë nga Prokuroria apo Policia e Shtetit, të kenë qenë në atë fazë kërcënimi, ashtu sikur është publikuar. Them se nuk duhet të jemi në atë nivel. Mos të harrojmë se kemi 23 shqiptarë që kanë humbur jetën në Siri dhe Irak. Kemi mbi 40 persona që janë kthyer dhe vazhdojnë të tjerë që të qëndrojnë atje edhe pjesë e veprimeve luftarake.
Ju keni eksperiencë edhe me ndeshjen me Serbinë, keni qenë drejtor në atë kohë. Si ka qenë atmosfera në qarkun e brendshëm?
Çdo aktivitet i rëndësishëm, jo vetëm ndeshjet, pasi të rëndësishme janë edhe vizitat e personaliteteve të larta, por në rastin e ndeshjes me Serbinë kishim një precedent. Kishte ndodhur diçka në ndeshjen e parë. Pritshmëritë ishin të tilla që jo thjesht duhej të garantohej siguria, por u morën masa që të evitoheshin edhe sjelljet e pahijshme karshi një ekipi, për të minimizuar mundësinë e interpretimit me bazë nacionale e të tjera me radhë, që në fund fare i shërben një urrejtjeje që nuk e shohim prezente në terma realë as në qytetarët shqiptarë, as në qeveritë respektive. Ndërsa në rastin e ndeshjes me Izraelin, flas në kapacitetin ku jam sot, nuk kemi pasur asnjë lloj pritshmërie në raportin e një alarmi paraprak. Stadiumi i Elbasanit i ka kaluar provat dhe testet e sigurisë. E njëjta gjë mund të thuhet edhe për Shkodrën. Nëse ekziston mundësia për veprime terroriste në një vend, thjesht shmangia nga ky stadium e bën të vështirë riorganizimin e grupimeve terroriste. Prandaj nuk duhet përhapur panik.
