Tre burra janë qëlluar për vdekje në një makinë në qytetin jugor francez të Marsejës.
Sipas mediave të huaja, në kohën kur ka ndodhur ngjarja, pesë persona ndodheshin në automjet dhe sapo kishin dalë nga një lokal nate kur u qëlluan me kallashnikovë, thotë policia.
Dy nga të shënjestruarit u larguan nga vendi i ngjarjes, ashtu si edhe sulmuesit e panjohur.
Policia e lidh ngjarjen me tregtinë e drogës, ku sipas tyre është rasti i 21 i vrasjeve të lidhura me drogën në Marsejë deri më tani këtë vit, thotë agjencia e lajmeve AFP.
Të shtënat e fundit kanë ndodhur në një zonë banimi të qytetit të dytë më të madh të Francës. Makina që transportonte pesë burrat – të gjithë rreth të 20-ave – u qëllua menjëherë pasi ata u larguan nga klubi i natës rreth orës 05:00.
Hetuesit i thanë mediave franceze se të pestë shtetasit ishin emra të njohur për policinë dhe jetonin në një zonë banimi ku krimi i drogës është i përhapur.
Ata thanë se një makinë e gjetur në flakë pranë vendit të ngjarjes tregon gjithashtu për përfshirjen e grupit të drogës, pasi kriminelët shpesh djegin automjetet e tyre për të shkatërruar provat.
Prefekti rajonal Frederique Camilleri u tha gazetarëve në vendngjarje se “e gjithë forca policore është mobilizuar për të gjetur autorët e këtyre krimeve të neveritshme dhe për të çmontuar rrjetet e trafikantëve që qëndrojnë pas kësaj dhune”.
Ajo shtoi se gjatë fundjavës, oficerët kishin sekuestruar armë, duke përfshirë tre pushkë kallashnikov, dhe arrestuan pesë persona me akuza për armë zjarri të lidhura me tregtinë e drogës.
Muajin e kaluar zonja Camilleri dhe prokurori lokal Dominique Laurens thanë se luftërat në terren mbi pikat fitimprurëse të trafikut të drogës në Marsejë po ktheheshin në një “vendetë”./Opinion.al
