Një mësuese ka përshkruar çastet e tmerrit kur një person hapi zjarr në shkollën ku po jepte mësim, në Orebro të Suedisë.
54-vjeçarja Maria Pegado tha se një person hapi derën e klasës pas pushimit të drekës dhe duke bërtitur, tha se të gjithë duhej të dilnin jashtë.
“I nxora të gjithë 15 nxënësit e mi në korridor dhe filluam të vrapojmë. Pastaj dëgjova dy të shtëna, por ia dolëm. Ishim afër hyrjes së shkollës. Pashë njerëz që tërhiqeshin zvarrë të plagosur. E kuptova se ishte shumë serioze”, tha ajo përmes një telefonate për BBC.
Dhjetë persona dyshohet se mbetën viktima të sulmit. Fillimisht, autoritetet njoftuan për pesë të plagosur, por në një deklaratë disa orë pas sulmit, Policia raportoi për 10 të vdekur. Mes viktimave është dhe vetë agresori, që qëlloi veten me armë pas sulmit.
Nuk dihen motivet e ngjarjes, megjithatë nuk dyshohet për terrorizëm. Sipas policisë, autori nuk kishte precedent të mëparshëm penal.
Gjithashtu nga policia raportohet se 6 persona janë dërguar në spital. 5 prej tyre kanë plagë të shkaktuara nga armët.
4 nga të plagosurit i janë nënshtruar ndërhyrjeve kirurgjikale ndërsa të plagosurit e tjerë thuhet se kanë lëndime të lehta. Nga ngjarja nuk raportohet për fëmijë të plagosur.
Në lidhje me këtë tragjedi ka reaguar edhe kryeministri suedez Ulf Kristersson, i cili tha se dita e sotme “është e dhimbshme për të gjithë Suedinë”.
“Mendimet e mia janë për ata që janë prekur nga ngjarja dhe të afërmit e tyre. Mendimet e mia janë edhe me ata dita normale e shkollës e të cilëve u zëvendësua me terror”, tha kryeministri.
Ai u shpreh se hetimet për rastin vijojnë duke u përpjekur që të zbulojnë çfarë fshihet nga pas.
