Një qendër refugjatësh në Suedi është tronditur nga një ngjarje e rëndë. Një azilkërkues 15-vjeçar ka vrarë një punonjëse të qendrës, i cila ishte 22 vjeç. Viktima, e cila ende nuk është identifikuar vdiq në spital nga plagët e rënda që kishte marrë.
Mendohet se punonjësja është qëlluar me thikë. Policia nuk ka dhënë shumë detaje për ngjarjen, por 15-vjeçari është arrestuar nën akuzën e vrasjes. Në këtë qendër janë të vendosur të rinj emigrantë nga 14 deri në 17 vjeç.
Kryeministri i Suedisë Stefan Lofven vizitoi qendrën e emigrantëve në Mölndal, afër Gothenburg, disa orë pas vrasjes. Ai deklaroi se ky është një krim i tmerrshëm, duke shtuar se suedezët kanë frikë se sulme të tilla mund të përsëriten.
“Besoj se shumë njerëz në Suedi ndihen të frikësuar se raste të tilla mund të përsëriten, pasi vendi ynë merr shumë fëmijë dhe të rinj, të cilët vijnë për të kërkuar azil”, ka thënë ai.
