Shtetet e Bashkuara kanë përfunduar evakuimin e stafit nga ambasada e tyre në Sudan.
Mediat amerikane kanë raportuar, duke cituar disa burime, sipas të cilave edhe familjarët e stafit të ambasadës janë evakuuar. Evakuimi u krye nëpërmjet një avioni ushtarak amerikan, por ende është e paqartë se ku po shkon stafi i ambasadës. Me evakuimin, ambasada amerikane në Sudan është mbyllur, të paktën përkohësisht.
Franca ka nisur një “operacion të shpejtë evakuimi” të qytetarëve të saj dhe personelit diplomatik nga Sudani, ku luftimet e dhunshme kanë hyrë në javën e dytë, njoftoi sot Ministria e Jashtme.
Janë kujdesur gjithashtu për qytetarët evropianë dhe ata të “vendeve partnere aleate”, shtoi ministria, pa dhënë detaje të mëtejshme.
Disa vende të huaja, përfshirë Italinë, po përgatisin evakuimin e mijëra bashkëqytetarëve të tyre, edhe nëse aeroporti kryesor i Sudanit mbetet i mbyllur.
RSF ka premtuar “bashkëpunim të plotë me të gjitha misionet diplomatike, duke siguruar të gjitha mjetet e nevojshme të mbrojtjes dhe garantimin e kthimit të tyre të sigurt në vendet e tyre”. Grupi më parë tha se ishte gati të hapte “pjesërisht” “të gjitha aeroportet” në Sudan për të evakuuar shtetasit e huaj. Nuk ishte e mundur të verifikohej se cilat aeroporte kontrollonte RSF. Luftimet kanë lënë qindra të vdekur dhe mijëra të plagosur, ndërsa të mbijetuarit përballen me mungesë të energjisë elektrike dhe ushqimit. Dje, Ministria e Jashtme e Arabisë Saudite njoftoi “ardhjen e sigurt” të 91 shtetasve të saj së bashku me të tjerë nga Kuvajti, Katari, Emiratet e Bashkuara Arabe, Egjipti, Tunizia, Pakistani, India, Bullgaria, Bangladeshi, Filipinet, Kanadaja dhe Burkina Faso. Ndërsa forcat detare të mbretërisë transportuan civilë përtej Detit të Kuq nga Port Sudan në Jeddah, luftimet kanë rifilluar në kryeqytetin e Sudanit Khartoum pas një qetësie të përkohshme./Opinion.al
