Nga një kërkim italian, vjen një shpresë konkrete për luftën kundër tumorit. Spitali “San Raffaele” i Milanos, ka prezantuar në SHBA një terapi imuno-qelizore kundër rikthimit të tumorit. Studimi është cilësuar si “revolucionar” nga ana e shtypit britanik. Kërkuesit kanë arritur të prodhojnë “qeliza-vrasëse T të përpunuara gjenetikisht” në gjendje “të bashkëjetojnë me çdo formë kanceri në sistemin e gjakut” dhe ta luftojnë atë.
Studimi është përshkruar në Uashington nga tre shkencëtarë gjatë takimit vjetor të “American Association for the Advancement of Science” (AAAS).
Gazeta britanike “Times”, i ka dedikuar hapjen e faqes së parë, duke nënvizuar rolin thelbësor të skuadrës mjekësore të spitalit “San Raffaele” të Milanos dhe të hematologes Chiara Bonini.
Por si do të funksionojë kjo gjë? Terapia e re konsiston në përdorimin e një lloj arme të prodhuar artificialisht nga sistemi imunitar, “i aktivizuar” të shkatërrojë qelizat kancerogjene. Në nëntor, instituti “San Raffaele” u bë protagonist i një tjetër kërkimi të rëndësishëm kundër tumorit, duke individualizuar një gjen të aftë të “zgjidhë” ndërthurjen e ADN-së, duke e bërë atë më të prekshëm për mutacionet që shkaktojnë kancerin.
Nga gjaku i pacientit merren qeliza të bardha, ato që normalisht luftojnë viruset dhe bakteret në trupin e njeriut, e modifikohen gjenetikisht me qëllimin të identifikojnë dhe të sulmojnë qelizat kanceroze.
Ato zhvillohen artificialisht në laborator, përpara se të injektohen përsëri në venat e të sëmurit, nga ku do të nisin gjurmimin dhe shkatërrimin e “armikeve” të veta. Specialistë në mbarë botën janë angazhuar në perfeksionimin e kësaj teknike.
