Sipas studimit më të fundit, një në tre fëmijë vuan nga miopia ose ndryshe “nuk shohin qartë gjërat në distancë.” Studiuesit thonë se ky shqetësim global sa vjen e rritet, aq sa deri në vitin 2050 pritet të preken miliona fëmijë të tjerë. Shikimi i fëmijëve është përkeqësuar ndjeshëm sidomos pas pandemisë.
Periudha e Covid-19 pati ndikim mjaft negativ te fëmijët pasi ata shpenzonin shumë kohë para ekraneve. Normat më të larta të miopisë paraqiten në Azi, 85% e fëmijëve në Japoni dhe 73% në Korenë e Jugut. Ndërsa në Kinë e Rusi 40% e fëmijëve mbajnë syze.
Nivelet më të ulëta të këtij problemi janë në Mbretërinë e Bashkuar, Irlandë, Paraguai dhe Uganda. Studimi i botuar te ”British Journal of Ophthalmology”, shqyrtoi kërkimet që përfshinin më shumë se 5 milionë fëmijë dhe adoleshentë nga 50 vende në të 6 kontinentet. Nga viti 1990 deri në 2023-in, miopia është rritur me 36%.
Ka faktorë që e bëjnë atë shumë më të mundshme, siç është përshembull gjenetika kur fëmijët e trashëgojnë prej prindërve. Por në shumicën e rasteve lidhet me ekspozimin ndaj ekranit të telefonit, kompjuterit apo televizorit.
Cilat janë shenjat e miopisë?
-Vështirësi në leximin e fjalëve nga larg, si p.sh. leximi i tabelës së bardhë në shkollë.
-Ulur pranë televizorit ose kompjuterit, ose duke mbajtur një celular ose tablet shumë pranë fytyrës
-Dhimbje koke
-Fërkim i shpeshtë i syve
/tvklan.al
