Një vajzë e re ka rënë pre e presioneve nga i dashuri i saj, i cili e ka shantazhuar me video dhe foto intime, nëse ajo do t’i jepte fund marrëdhënies së tyre. Vajza ka pasur 8 muaj lidhje dashurie me shtetasin Tomas Beka dhe ky i fundit ka filmuar skenat intime.
Vajza ka ndërprerë lidhjen për shkak të insistimit të nënës së saj, por kjo ka revoltuar të dashurin e saj, i cili ka përndjekur nënë e bijë, duke i kërcënuar me jetë dhe shantazhuar, ndërsa në dy raste ka keqtrajtuar dy shokët e klasës së vajzës, raporton Shqiptarja.com.
Pas presionit dhe kërcënimit me telefon me shprehjet “…do t’ju pres fytin, do dergjeni në birucë, do t’ju vras etj.”, vajza A.M është mbyllur në banesë nga frika. Ndërkohë që shantazhet kanë vijuar ndaj nënës së saj, e cila është detyruar të kallëzojë në polici Tomas Bekën. Ky i fundit pak ditë më parë është deklaruar fajtor nga gjykata e Tiranës, duke u dënuar me 7 muaj e 20 ditë burgim për akuzën e “përndjekjes”.
Nga hetimet hetimore të kryera në vijim, rezulton se E.M. studente tek Inxhinieria e Ndërtimit ka paraqitur kallëzim penal ndaj të pandehurit, për shkak të shqetësimeve të vazhdueshme që ky shtetas po i krijonte asaj personalisht dhe familjes së saj në tërësi.
