Një student përmes një lidhje Live për emisionin “Opinion” në Tv Klan, përpara Ministrisë së Arsimit, deklaroi se ajo që ndodhi të martën në darkë, është përpjekja e disa personave që janë të lidhur me forumet politike për të përçarë protestën.
Ai tha se kjo gjë u arrit nga ata, pasi protesta u përça. Studenti deklaroi se opinionet e ndryshme janë edhe thelbi i një universiteti, pasi pika e fortë e kësaj proteste nuk është organizimi, por fakti se ajo zgjati shtatë ditë dhe pritet të zgjasë akoma më tepër derisa të arrihen kushtet.
Studentët janë të vendosur për të mos vazhduar negociatat me kryeministrin Edi Rama, pasi kërkesat e tyre janë tepër të qarta dhe mjafton vetëm të realizohen.
Studenti: Tani ajo që po ndodh është që pas përpjekjeve të disa personave që janë të lidhur me forumet politike, protesta e sotme u përça. Protesta u përça, opinionet e ndryshme janë thelbi i një universiteti, pika e fortë e kësaj proteste nuk është organizimi, por fakti se ajo zgjati 7 ditë dhe kërkoj që të zgjasi edhe 7 ditë tjera. Grupet e ndryshme të protestuesve nuk kanë rëndësi, pasi ka disa grupe të tjera në të gjithë Shqipërinë dhe kjo është një gjë që i ka munguar Shqipërisë. Nuk ka nevojë për diskutime dhe as për negociata, janë pika minimale, për të arritur në negociata të mëtejshme. Normalisht që duhet t’i marrim ato, pasi janë shumë të qarta. Nesër edhe çdo ditë që është e nevojshme do të qëndrojmë para Ministrisë së Arsimit. Kjo që po thonë këta këtu është se nuk keni parë asgjë akoma.
