Në fakultetin e Drejtësisë pranë UT-së nuk janë hapur dyert për të zhvilluar mësim as këtë të mërkurë. Një grup studentësh janë ngujuar prej 1 jave në ambientet e fakultetit. Një përfaqësues i studenteve-protestues tha për mediat, se bojkoti do të vijojë pa afat deri në plotësimin e kërkesave. Më tej ai tha se studentet që qendrojnë gjatë gjithë natës në godinë janë alternuar me njëri-tjetrit. Pra e kanë bërë me turne, në mënyrë që të mos u shterren fuqitë. Po kështu studentë të tjere qendrojnë paradite para godinës në mbështetje të shokëve të tyre të ngujuar.
Ndryshe nga Ekonomiku, në fakultetin e Drejtësisë administrata vazhdon punën. Sekretaria është e hapur për të gjithë ata që kanë nevojë për shërbimet administrative.
I pyetur nëse pedagogët e mbështesin protestën e tyre, studenti tha: “Po, na kanë mbështetur, por ne kërkojmë që ata të dalin publikisht në mbështetjen tonë. Ne presim në orët në vazhdim të mbidhet asambleja e pedagogëve dhe të dalin me një vendim”.
Foto: Nga protesta e studentëve tek “Drejtësia”
