Qindra njerëz u mblodhën në një protestë të quajtur “Studentët për Kosovën” të organizuar nga studentët e Universitetit të Beogradit, duke denoncuar planin e BE-së për normalizimin e marrëdhënieve ndërmjet Kosovës dhe Serbisë.
Protestuesit kritikuan gjithashtu idenë e formimit të një Asociacioni të Komunave me Shumicë Serbe në Kosovë, një organ i planifikuar për të përfaqësuar komunitetin serb të Kosovës që ishte rënë dakord në një marrëveshje të mëparshme të nënshkruar në Bruksel në 2013, por ende nuk është zbatuar.
“Ne kemi vetëm një kërkesë të vetme, është e qartë dhe nuk do të heqim dorë prej saj, ajo është ndërprerja e menjëhershme e të gjitha negociatave dhe diskutimeve në kuadër të planit franko-gjerman”, tha një nga folësit.
“Ai plan e çon popullin serb në rrënim, dhe qeveria që e nënshkruan atë çon në tradhti,” thuhej.
Protesta u mbajt në Fakultetin Filozofik, pas së cilës protestuesit shkuan në këmbë drejt ndërtesës së Radio Televizionit të Serbisë, RTS, duke kërkuar që shërbimi publik t’u ofrojë mundësi njerëzve që të dëgjojnë një mendim tjetër për këtë çështje.
Folësit gjithashtu pohuan se qeveria e Serbisë dhe presidenti Aleksandar Vuçiç kishin sinjalizuar tashmë qëllimin e tyre për të pranuar planin, me thirrjet “Tradhti”, “Poshtë qeveria” dhe “Dorëheqje”.
Gazetari i agjencisë së lajmeve FoNet, Marko Dragoslaviq, u sulmua pas protestës, raportuan mediat, duke shtuar se një burrë i panjohur iu afrua nga pas, i tërhoqi një kapuç mbi kokë dhe e goditi dy herë në fytyrë, më pas u largua.
Disa politikanë nga partitë e djathta parlamentare morën pjesë në protestë.
Disa parti të krahut të djathtë Zavetnici, Dveri dhe Partia e Re Demokratike e Serbisë, DSS e kanë kritikuar ashpër marrëveshjen, duke pretenduar se ajo pranon qartë pavarësinë e ish-krahinës serbe, të cilën Serbia është zotuar se nuk do ta njohë kurrë.
Ata paralajmëruan një protestë të re më 17 mars, një ditë para takimit të planifikuar në Shkup, ku kryeministri i Kosovës Albin Kurti dhe presidenti serb Vuçiç do të takohen sërish për të biseduar për propozimin e BE-së./Opinion.al
