Një person është vënë në pranga ndërsa 2 të tjerë u shpallën në kërkim nga policia pasi kishin strehuar në një magazinë 28 emigrantë të paligjshëm. Sipas uniformave blu, ata kishin qëllim të ndihmonin emigrantët për t’i transportuar drejt vendeve të BE-së në këmbim të parave.
“Në zbatim të planit të masave për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, specialistët për Hetimin e Trafiqeve të Paligjshme në DVP Fier në bashkëpunim me Njësinë Hetimore në DPPSH finalizuan operacionin policor të koduar “Ndalesa”, në përfundim të të cilit u arrestua në flagrancë shtetasi Z. M., 52 vjeç, banues në Shkodër”, njofton policia.
Janë shpallur në kërkim dhe po punohet për kapjen e shtetasve K. K. (M)., 30 vjeç, banues në Vlorë dhe S. M. (G).,37 vjeç, banues në Patos.
Këta 3 persona në bashkëpunim me njëri-tjetrin kishin strehuar 28 klandestinë në një magazinë në fshatin Portëz.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale./ Opinion.al
