Nënkampionia e Europës në Atletikë, Luiza Gega dhe trajneri i saj Taulant Stërmasi, të pranishëm në studion e emisionit “STOP” kanë folur mbi disa problematika me të cilat ata po përballen dita-ditës. Problematika të cilat vijojnë të shpërfillen nga shteti shqiptar.
Ndonëse Gega e ka bërë krenare Shqipërinë duke valëvitur flamurin kuq e zi nëpër Europë, ajo është ndjerë e pavlerësuar nga ky vend për të cilin ajo ka sakrifikuar aq shumë dhe vazhdon të sakrifikojë me shpirt.
Në studion e “STOP” atletja dhe trajneri i saj theksuan neglizhencën dhe mungesën e mbështetjes që kanë nga shteti shqiptar.
Sa i përket vlerësimit monetar atletja rrëfen se ndonëse nënkampione Europe ajo merr 1 milion lekë të vjetra në vit, e madje ndonëse ka 15 vite eksperiencë ajo nuk figuron e siguruar.
Nga ana e tij trajneri Taulant Stërmasi thotë e mërzit fakti që atletët nuk marrin kontributin që u takon në bazë të rezultateve që ata japin. Madje ai shton se edhe në rast dëmtimesh të sportistëve ata janë të detyruar të paguajnë nga xhepi i tyre pasi shteti nuk u jep asnjë qindarkë.
Stërmasi theksoi se përveç pagave, shqetësuese për sportistët dhe trajnerët është edhe infrastruktura , për të cilën tha se është mjaft e rrënuar dhe nuk krahasohet me vendet europiane.
Në fund atljetja Luiza Gega tha se të gjithë sportistët jetojnë me shpresë se një ditë do të bëhet më mirë në këtë vend. Por kjo thirrje e tyre kur do të bie në “veshët” e qeverisë?
