Një ditë më parë, emisioni investigativ “STOP”, në Televizionin Klan, transmetoi bisedën telefonike të Ministrit të Shëndetësisë, Ilir Beqaj me ish – kreun e Fondit të Kujdesit Shëndetësor të Tropojës, Çlirim Hajdarmataj.
Në këtë bisedë telefonike, Ministri Beqaj i kërkon llogari zyrtarit të Tropojës, se pse nuk mori pjesë në mbledhjen e asamblesë socialiste të qytetit, duke i bërë të ditur edhe shkarkimin nga puna.
Pas transmetimit të kësaj bisede në emisionin “STOP”, vetë Ministri reagoi në rrjetin social “Facebook”, duke u shprehur se shkarkimi ishte bërë për shkelje ligjore, për pagesë të një punonjësi pa u paraqitur në punë.
Ja se çfarë shkruan ai në profilin e tij:
“Po, ajo çka është inçizuar dhe transmetuar sonte si një “skandal” i madh, është e vërtetë, por jo e gjithë e vërteta. Sepse, faktikisht, zotëria nuk është larguar nga puna si anëtar i padisiplinuar i PS-së dhe as është larguar me kërkesën time.
Por, është larguar pasi është kapur në shkelje flagrante të ligjit.
Shkelja në fjalë ishte se i ka paguar rrogën për tre muaj personit në detyrën e ekonomistit, i cili nuk ka qenë fare në Shqipëri gjatë kësaj kohe.
Kështu që, duke shprehur keqardhjen që “u mbars mali e polli një mi”, si dhe duke i siguruar teleshikuesit apo lexuesit e gjysëminformuar mbi këtë episod, se hakmarrja e asnjëlloj natyre nuk është as pjesë e kulturës sime shoqërore, apo aq më pak e edukatës sime familjare, mbetem i përkushtuar në realizimin e objektivave të Qeverisë në sektorin ku kam nderin të drejtoj si ministër i shëndetësisë.”
Por vetë Hajdarmataj iu përgjigj tashmë nga SHBA Ministrit, duke i thënë se kishte deklaruar një të pavërtetë dhe duke e sfiduar me vajtjen në prokurori. Ai nuk ngurron t’i shkruajë Ministrit në statusin e lartëpërmendur.
“Z.Ministër! Është shumë gënjeshtër e shëmtuar kjo që po thua ti. Nuk është e vërtetë, siç e di edhe vetë ti, që të kam vënë në dijeni me mesazh dhe atë ditë që zgjodhe sekretarin e PS në Tropojë, t’a kam sqaruar përballë. Personi në fjalë me dt.15.06.2016. Deri më dt.13.07.2016 ka qenë me leje. Dhe është larguar nga puna pasi nuk është paraqitur në punë. Asnjë ditë pune nuk është paguar në mënyrë të padrejtë. Por ti je vënë në dijeni gabim siç je informuar vazhdimisht për çdo vendimarrje politike që ke bërë.
Referoje rastin në prokurori, por e ke të qartë, që pasi të hetohet do të thërrasin për kallëzim të rremë, unë të them publikisht që është shpifje, gënjeshtër për tu mbrojtur.”
Edhe disa nga deputetët gjatë hyrjes për në seancën e sotme plenare dënuan aktin e shkarkimit të zyrtarit, për shkaqe partiake.
Fatmir Mediu u shpreh: “Mendoj që është një problem shumë i madh, që administrata pretendon të kthehet në politike, si në emërim por edhe në shkarkim, ka vetëm një logjikë: logjika është kur i shërben partisë dhe kur i shërben njerëzve.”
Astrit Patozi tha se për këtë ngjarje ka reaguar mbrëmë, me një status në “Facebook”.
Dashamir Shehi tha: “Në këtë vend kështu është bërë , nga të gjitha palët. Balanca anon nga pushteti, shtetin nuk e njohin fare, duhen burra të tjerë jo këto që janë.”
Edi Paloka: “Kjo më duket gjëja më e vogël që mund të bëjë Ilir Beqaj. Beqaj e ka suksesin në jetë për vete.”
Mimoza Hafizi: “Kjo është një nga shfaqjet normale të politikës së sotme, e cila e shfrytëzon partitë politike të vjetra, shfrytëzojnë administratën për interesa politike.”
Ndërsa Eduard Ndocaj tha: “Kjo ngjarje është e papranueshme, që një ministër të interferohet në çëshjte të tilla, por ky është një rast absurd që e përdorin.”
Ndërkohë një pjesë tjetër deputetësh, si Pandeli Majko apo edhe Erjon Braçe hezitojnë të japin opinionin e tyre në lidhje me këtë ngjarje. Edhe vetë Ministri Beqaj ka heshtur përballë pyetjes që gazetarja i bëri në lidhje me shkarkimin e Çlirim Hajdarmatajt./tvklan.al
