Jens Stoltenberg u ka kërkuar anëtarëve të NATO-s që të dërgojnë me shpejtësi më shumë ndihmë ushtarake në Ukrainë për të shmangur “gabimin e rëndë historik” të një fitoreje ruse në fushën e betejës.
Sekretari i Përgjithshëm i aleancës tha se ukrainasve “nuk po u mbaron guximi, por atyre po u mbaron municioni”, shkruan Sky News.
“Së bashku ne kemi kapacitetin për t’i siguruar Ukrainës atë që i nevojitet,” tha ai. “Ne duhet të tregojmë vullnetin politik për ta bërë këtë.”
Vendet e NATO-s duhet të “gërmojnë thellë dhe të arrijnë shpejt” pasi vonesat do të çojnë në “pasoja reale në fushën e betejës”, tha Stoltenberg teksa dorëzonte raportin vjetor për vitin 2023.
“Ky është një moment kritik. Do të jetë një gabim i rëndë historik të lejosh Putinin të mbizotërojë,” tha ai.
