Sot Jozefina Topalli dhe Arben Imami i bënë thirrje kolegëve, pra demokratëve që nuk u përfshinë në lista por edhe mbështetësve të tyre në degët e partisë që të mblidhen për të shkarkuar Kryetarin e PD-së Lulzim Basha.
Por si përcaktohet në ligjin (statutin) e Partisë Demokratike shkarkimi i kryetarit?
“Kryetari, nënkryetari dhe sekretari zgjidhen cdo katër vjet, me votim të fshehtë, nga mbledhja e të gjithë anëtarëve të seksionit, sipas parimit “Një anëtar, Një votë”. Numri i kandidaturave që i nënshtrohen votimit duhet të jetë të paktën dy për cdo pozicion. Kryetari nuk mund të zgjidhet më shumë se dy herë radhazi”, thuhet në status.
Ndërkohë në nenin 34 mbi Kuvendin Kombëtar të PD, në pikën 6 thuhet:
Kuvendi Kombëtar zgjidhet si rregull çdo katër vjet. Vendimin për mbledhjen e Kuvendit Kombëtar e merr Këshilli Kombëtar ose Kryesia Qendrore me propozim të Kryetarit të PD. Kuvendi mund të mblidhet edhe kur e kërkojnë ¼ e anëtarëve të PD ose ¼ e anëtarëve të Kuvendit Kombëtar.
Data e zhvillimit të Kuvendit dhe rendi i ditës njoftohen të paktën një muaj përpara ditës së parë të Kuvendit.
Neni 35, Kompetencat e Kuvendit Kombëtar
Kuvendi Kombetar:
Pika 3- zgjedh me votim të fshehtë Këshillin Kombëtar nga një listë ku numri i kanditatëve të mos jetë më pak se 1.5 herë më i madh se numri i vendeve që do të shpallen fitues sipas modaliteteve të përcaktuara nga Kryesia e Partisë;
Pika 4- vendos për shkarkimin e Kryetarit të Partisë mbi bazën e një mocioni mosbesimi të miratuar nga më shumë se gjysma e anëtarëve të Këshillit Kombëtar;
Pika 8- Të drejtën për t’i bërë kërkesa dhe propozime Kuvendit Kombëtar e kanë:
- Kryetari i Partisë;
- Këshilli Kombëtar;
- Kryesia e Partisë;
- Kryesia e Degës të Partisë;
- Jo më pak se pesëmbëdhjetë përqind e anëtarëve të Kuvendit me të drejtë vote, të shpërndarë të paktën në pesë degë të PD. Kërkesat për propozim kandaturash sipas kësaj gërme, duhet ti nënshtrohen të njëjtave procedura si të tre gërmave të para.
