Fillon sot “Premier League”. Ribashkimi në llogore të ndryshme i Pep Guardiola dhe Jose Mourinho, nënshkrimi rekord i Paul Pogba, brilanti Zllatan Ibrahimovic dhe Leicesteri, një “zanë përrallash”, janë bukuritë e kampionatit anglez të futbollit. Nëse shumica e ligave tërheqëse europiane kanë nga një, dy apo tri ekipe rivalizuese për titull, siç ka ndodhur kohët e fundit, apo sikurse e ka përshkruar Jose Mourinho, në ishull ndodh krejt ndryshe. “Premier League” ngre siparin sot dhe bëhet turneu më i hapur, më spektakolar për klubet dhe mediat botërore.
Prania e trajnerit portugez, në themel të projektit të ri të Manchester United, nënshkrimi i Pep Guardiolës për Manchester City, rivalët e mëdhenj të “djajve të kuq”, bën që të fillojë një fazë të re në kampionatin anglez, i cili qarkullon më shumë se një billion euro. “Pjesën e luanit” në këtë drejtim e mbajnë Chelsea, Arsenal, Liverpool dhe, madje, edhe Tottenham e Leicester, kampioni aktual, që vijnë pas dy Manchesterëve. Të gjithë këto janë kandidatë edhe për titullin.
Injeksioni ekonomik që kanë marrë klubet (130 milionë euro në sezon) për tri vitet e ardhshme, si rezultat i marrëveshjes së re të të drejtave televizive (7.000 milionë euro në mes viteve 2016 dhe 2019) ka mundësuar një merkato tepër të nxehtë kësaj vere në “Premier League”. Me Paul Pogba në krye, tetë nga dhjetë blerjet më të shtrenjta të sezonit u përkasin klubeve angleze, më të përforcuar se kurrë, gati për ta kthyer ligën e tyre në më të fuqishmen në botë, si dhe në përpjekje për të thyer aksin Madrid- Barcelona-Torino-Munich në Europë, në një Champions edhe më shumë karatsh.
Pogba, për të cilin Manchester United ka paguar 105 milionë euro, është bërë futbollisti më i shtrenjtë në histori. Me siguri mbi atë do të vendosen të gjithë sytë. Por mesfushori i talentuar francez nuk është ylli i vetëm që i është bashkuar “Premier Lague”. E njëjta ka ndodhur me Manchester United, që ka marrë Ibrahimovic (PSG), Bailly (Villarreal) dhe Mkhitaryan (Borussia Dortmund), për një investim prej 185 milionë eurosh, i tejkaluar vetëm nga 195 milionë eurot e Manchester City, të shpenzuara për merkaton e kësaj vere, me ardhjen e Gundogan (B.Dortmund), Zinchenko (Ufa), Nolito (Celta), Sane (Schalke) dhe Stones (Everton). Ky i fundit, një qendërmbrojtës, që që ka kushtuar rreth 60 milionë euro.
“Jam këtu për të fituar tituj”, – ka thënë Guardiola dje, duke vënë në dukje se “ka pesë, gjashtë, shtatë, ose tetë ekipe të mëdha, që kërkojnë të njëjtën gjë.” Në këtë paketë, Arsenali, me një fuqi punëtore të konsoliduar dhe ku nënshkrimi më i madh është Granit Xhaka, kthehet si “Sizif” në betejën për titull, së bashku me Chelsea. Blutë e Londrës vazhdojnë të dëshpëruar kërkimet në merkatopër një sulmues, të cilin t’ia bashkangjisin belgut Batshuayi, në dyshim për vazhdimësinë e Diego Costa. Me opsione shtesë, Liverpool është i vendosur për ta thënë si duhet fjalën e tij, sikurse një ekip tjetër, pothuajse i pandryshuar, Tottenham, i cili ka ruajtur të gjithë talentet e rinj.
