Ideja e krijimit të një dege të forcave të armatosura amerikane që do ushtrojë veprimtarinë e saj në hapësirë është prezantuar nga presidenti i SHBA-së, Donald Trump.
Duke folur para një personeli ushtarak në bazën detare Marimar, Trump tha se strategjia e tij e re kombëtare e sigurisë pranon se; “Hapësira është një fushë e operacioneve ushtarake si toka, ajri dhe deti”,- siç raportohet nga CNBC dhe media të tjera amerikane.
“Ne mund të kemi një Forcë Hapësire … kemi Forcën Ajrore, do të kemi edhe Forcën Hapësinore,”- tha ai.
Kjo nuk është një shaka. Ashtu siç e pranoi vetë, termin fillimisht e kishte përdorur me humor, duke diskutuar shpenzimet e qeverisë amerikane dhe investimet private në hapësirë.
Presidenti u shpreh para marinsave: ndoshta kemi nevojë për një forcë të re, do ta quajmë Forcë Hapësinore, por nuk e kisha seriozisht në fillim. Pastaj thashë me veten “sa ide e mirë”, ndoshta duhet ta bëjmë”.
Siç shtoi presidenti amerikan, shumë astronautë në fillim ishin ushtarakë dhe ushtria “do të jetë jetike për të siguruar që Amerika të vazhdojë rrugën drejt yjeve”.
Nuk është hera e parë që kjo çështje diskutohet. Një propozim përkatës për krijimin e “Korpusit Hapësinor” u bë gjithashtu në qershor të vitit 2017 nga një nënkomision i Komitetit të Forcave të Armatosura të Dhomës së Përfaqësuesve. Kjo forcë synonte të funksiononte si një organ ushtarak i veçantë brenda departamentit të Aviacionit dhe nën drejtimin e sekretarit të Aviacionit.
Ky organ do të kishte shefin e vet, i cili do të merrte pjesë në Shtabin e Përgjithshëm dhe do t’i përgjigjej sekretarit të Aviacionit. Gjithashtu, propozimi përfshinte krijimin e një komande hapësinore amerikane, në kuadrin e Komandës Strategjike të SHBA-së.
Ky propozim përfundimisht ngeli jashtë projektligjit përfundimtar për mbrojtjen kombëtare në nëntor, por kishte disa direktiva të reja në legjislacion që mund të çonin në krijimin e një force të tillë në të ardhmen./Opinion.al
