Kryeministri i Kosovës, Albin Kurti ka reaguar ditën e sotme për fillimin e shërbimeve të Starlink në Kosovë.
Përmes një postimi në rrjetet sociale, Kurti e cilësoi këtë gjë si një hap të rëndësishëm drejt avancimit të infrastrukturës digjitale dhe përmirësimit të qasjes në internet për të gjithë qytetarët.
Postimi i plotë i Kurtit:
”Starlink tash edhe në Kosovë.
Pas lëshimit të autorizimit nga Autoriteti Rregullativ i Komunikimeve Elektronike dhe Postare, Starlink ka filluar shërbimet satelitore të qasjes në internet edhe në Kosovë.
Ky është një hap i rëndësishëm në avancimin e infrastrukturës digjitale në vend dhe ofron mundësi të shumta për qasjen në internet në çdo lokacion e cep të territorit të Republikës së Kosovës.
Starlink është dëshmuar jashtëzakonisht i rëndësishëm në mundësimin e komunikimit kritik gjatë fatkeqësive natyrore ose rasteve të tjera të emergjencave kombëtare.”
