Kulla Eiffel, një prej atraksioneve më të mëdha turistike në botë, u mbyll për publikun më 27 dhjetor, pasi stafi hyri në grevë, njoftoi operatori i Kullës.
Një nga vendet më të vizituara në botë, Kulla Eifel është zakonisht e hapur 365 ditë në vit dhe pritet të luajë një rol qendror në Lojërat Olimpike të Parisit 2024.
Disa turistë u tronditën dukshëm kur panë një tabelë të madhe nën fasadën e saj të hekurt që shpallte mbylljen në shumë gjuhë dhe kërkonte falje për shqetësimin.
Stephane Dieu i sindikatës CGT tha se ishte planifikuar të rihapte të enjten.
Greva u shpall përpara negociatave për kontratën që priten muajin e ardhshëm me qytetin e Parisit, i cili zotëron monumentin 134-vjeçar, tha një zëdhënës i kompanisë që menaxhon kullën, SETE.
Sindikatat thanë se 400 punëtorët e kullës janë të shqetësuar për perspektivat afatgjata për monumentin.
“Kulla ka më shumë se 130 vjet dhe ka filluar të lodhet. Ka shumë punë rinovimi që duhen bërë në vitet dhe dekadat e ardhshme. Kompania administruese ka nevojë për mjete për ta përballuar këtë”, tha Dieu.
Ai tha se greva ishte një “aksion simbolik në një ditë simbolike, për të përkujtuar përvjetorin e vdekjes së Eifel-it dhe për të ruajtur veprën e tij”.
Atraksioni normalisht sheh rreth 20,000 vizitorë në ditë këtë kohë të vitit, tha zëdhënësi i kullës.
Një shfaqje e veçantë muzikore që shënon vdekjen e Gustave Eiffel më 27 dhjetor 1923, ishte planifikuar ende të transmetohej në rrjetet sociale dhe televizionin francez të mërkurën mbrëma, sepse ishte regjistruar paraprakisht, tha zëdhënësi./Opinion.al
