TIRANË- Informatorët e jashtëm të tatimeve për të marrë shpërblimin prej 5 mijë lekësh duhet të plotësojnë dy formularë. I pari përmban të dhënat personale dhe numrin e llogarisë të informatorit, kurse në formularin e dytë do të shënohen shkeljet që do të denoncohen.
Në formularin e vetëdeklarimit, informatori duhet të shënojë të dhënat e tij personale, emrin, adresën e banimit, numrin e celularit, numrin e llogarisë bankare ku do të kryhet pagesa, fotokopje të kartës së identitetit dhe nënshkrimi.
Puna e tij do të jetë survejimi i bizneseve dhe denoncimi në rastet kur nuk përdoret kasa fiskale, dhe kur ka punonjës të paregjistruar. Përveç shkeljeve të biznesit, spiunët do të denoncojnë edhe shkeljet e tatimorëve.
Formulari i dytë specifikon shkeljet që denoncon një informator. Ky formular, sipas Ministrisë të Financave, synon mbledhjen e informacionit nga Drejtoria e Përgjithshme e Tatimeve për të denoncuar evazionin nga biznesi dhe korrupsionin e tatimorëve.
Në kolonën e parë të formularit do të shënohet emri i tatimorit, që informatori mendon se është i korruptuar, adresa e banimit, pozicioni i punës dhe karakteristika të tjera të tij.
