Spitali Amerikan do organizojë me datë, 27 Janar, një koncert bamirësie, nën emrin: “Më shumë tinguj tani e përgjithmonë”, në ndihmë të fëmijëve që janë lindur me probleme në sistemin e dëgjimit.
Ky koncert zhvillohet në prag të festimit të 10 vjetorit të krijimit të Spitalit Amerikan.
Të ftuar në këtë aktivitet do të jenë disa prej emrave më të njohur të muzikës lirike dhe asaj tradicionale shqiptare, e pranishme do të jetë edhe sopranoja e sukseshme botërore Maria Jose Siri, tenorët Josif Gjipali, Kastriot Tusha dhe Mario Karaj. Soprano Sindi Mamaqi, si dhe këngëtarët Rona Nishliu, Dren Abazi së bashku me pianistin Ekland Hasa. Orkestra do të jetë nën drejtimin e dirigjentit të mirënjohur italian Francesco Ledda. Koncerti do të jetë në prezantimin e Ema Andreas.
Mësohet se koncerti do të sjellë për publikun shqiptar aromën e muzikës klasike më të zgjedhur, me një repertor brilant nga trojet shqiptare dhe ariet më të bukura të muzikës botërore.
Koncerti do të mbahet në Pallatin e Kongreseve, në datë 27 Janar, në orën 20.00.
Të ardhurat nga shitja e biletave do të shkojnë për realizimin e operacionit për vendosjen e implantit koklear tek fëmijët që kanë lindur me probleme me dëgjimin.Implanti koklear është mrekullia teknologjike e fundit që mundëson sjelljen e tingullit në veshin e paaftë për të dëgjuar.
Për më shumë vëmendje dhe përkrahje ndaj kësaj teme shumë sensitive, Spitali Amerikan, ju fton të bëheni pjesë!
