Deputeti Kostaq Papa, i njohur për fjalimin në Kuvend ku tregonte për të shkuarën “xhentëllmene” kur vajzat në shoqërinë e tij pinin më shumë uiski se ujë, kërkoi një interpelancë me ministrin për Europën dhe Punët e Jashtme për shqiptarët në trojet etnike.
“Kërkoj krijimin e komisionit parlamentar për 10 vite për trojet etnike, ose krijimi i një ministre për trojet etnike për 10 vite. Dhënia e pasaportës për shqiptarët në trojet etnike, por edhe Turqi, Qipro, Ukrainë. Platformë për mbrojtjen e vendbanimeve shqiptare. Kur serbët e Kosovës kanë status maksimal, për shqiptarët e Kosovës lindore dhe Medvegjës nuk u pyet fare. Shqiptarët në trojet etnike u tradhtuan nga Tirana. U vuri edhe traun e Morinës dhe për mbështetje nuk bëhet fjalë. Në Mal të Zi, komunat me shqiptarë në kufi me Kosovën u shpopulluan. Medvegja është e rrezikuar nga heshtje e diplomacisë shqiptare. Nga koalicioni shqiptar nuk pritet gjë. Koalicioni në Kosovën lindore nuk ka substancë. Të hapen konsullatat shqiptare në Kumanovë, Ohër, në Tivar, Ulqin, Bujanoc, ose Medvegjë, që nuk është mbrojtur sa duhet” tha ai.
Në mungesë të kryeministrit Edi Rama, i cili është edhe ministër i Jashtëm, deputetit iu përgjigj ministrja e Shtetit për Marrëdhëniet me Parlamentin Elisa Spiropali.
Spiropali tha se në Luginën e Preshvës bashkuam shqiptarët për herë të parë në një listë të vetme.
Ajo nuk kurseu edhe ironinë kundër deputetit opozitar.
“Zoti Papa bisedimet diplomatike nuk janë ulje në tryeza baresh dhe përfaqësuesit përballë nuk janë gra që në përfytyrimin tuaj joshen me një uiski, por bisedime të vështira që kanë për bazë të drejtat që i garantojnë të drejtat dhe jo folklorizmat patriotikë”. /Opinion.al
