Është shoqëruar me replika seanca e sotme plenare në Kuvendin e Shqipërisë. Ka qenë ministrja e Shtetit për Marrëdhëniet me Parlamentin, Elisa Spiropali, ajo që i është përgjigjur fjalës së kreu të PD Sali Berisha.
Sipas Spiropalit aleatët e Berishës kanë vetëm një hall, ta shpëtojnë atë nga asgjësimi politik.
Po ashtu ministrja foli edhe për lobimin rus në PD.
“Ky parlament ka ngritur komision hetimor që ka çuar materiale dhe dokumente në prokurori për dorëzaninë që keni bërë ju dhe njerëz rreth jush mbi këtë sistem. Do jepni përgjigje për këto apo do flisni për vizitat tuaja që bëni sot. Ikni shihni se si është Kamza sot. Nuk kishte një çerdhe publike në të gjithë Kamzën, për të mos folur me Bashkitë e tjera që i keni drejtuar. I keni lënë aty se i shihni njerëzit si vota. I përdorni si mish për top. Shkoni dhe shihni sot Kamzën, Laçin, Lezhën që janë ngritur nga tërmeti shkatërrimtar. Në çdo luftë ka aleatë që të mbështesin, ju kryesoni shoqatën e Renegatëve në çdo luftë. Në këtë luftën e fundit, që përmendët, edhe këtu pa asnjë kujdes, s’keni pasur fakte dhe as për faktin se po Shqipëria është në një luftë. Sulm i paprovokuar nga një shtet që ka tentuar të shkatërrojë sistemet tona dixhitale. Keni dhe aleatët tuaj, ata që navigojnë te lajmet e rreme. Ata kanë një hall, t’ju shpëtojnë juve personalisht, nga asgjësimi juaj politik. Ju e mbronit Lul Bashën, i pastër si kristali. Ky me para ruse? PD që ka sjellë këtu lirinë e demokracinë? Ku e keni sot Lulin? Sot keni ngritur audit sa për të qeshur, për të gjetur rublat në xhepat e Lulit. Kjo është qesharake. Kjo nuk ju shkon juve që pretendoni se jeni një burrë shteti. As në makthin më të madh nuk qeverisni dot shqiptarët.””-tha Spiropali.
Më herët ish-kryeministri Berisha kritikoi qeverinë për situatën energjitike në vend dhe për situatën në të cilën ndodhen universitetet në një kohë që edhe pedagogët janë ngritur në protestë.
