Prokuroria spanjolle i kërkoi zyrtarisht Gjykatës Supreme masën e arrestit ndërkombëtar për presidentin e shkarkuar katalanas Carles Puigdemont dhe bashkëpunëtorëve të tij që ndodhen në Belgjikë.
Akuza spanjolle kërkoi gjithashtu edhe arrestimin e 8 prej 9 zyrtarëve katalanas të paraqitur këtë të enjte përpara gjykatësit. Mbi ta rëndojnë akuzat e rebelimit, kryengritjes dhe keqpërdorimit të fondeve publike. I vetmi që i shpëtoi kërkesës për arrest ishte ish-ministri i tregtisë së Katalonjës, i cili dha dorëheqjen një ditë përpara se parlamenti katalanas të votonte pavarësinë.
Gjykata supreme spanjolle kërkoi nga Puigdemont dhe bashkëpunëtorët e tij të paraqiten në seancë, por ish-presidenti katalanas nuk pranoi të kthehet në Spanjë, duke e cilësur procesin ndaj tij si “gjyq politik”.
Avokati i Puigdemont përsëriti se klima e ndërtuar në Madrid nuk është e duhura, por tha se klienti i tij pranon të bashkëpunojë me drejtësinë spanjolle dhe belge.
Carles Puigdemont dhe zyrtarët e tjerë shkarkuar rrezikojnë deri në 30 vjet burg.
Mijëra katalanas u mblodhën në Barcelonë në mbështetje të krerëve rajonalë, duke brohoritur Puigdemont president.
