Prokuroria e Posaçme ka zgjatur me 3 muaj hetimet për ish-zv/Kryeministrin Arben Ahmetaj.
Sipas tvklan mësohet se afatet hetimore do të zgjaten deri në Mars të vitit 2025.
Po kështu, hetimet janë zgjatur edhe për personat e tjerë që po hetohen me Ahmetajn në këtë dosje, siç janë ish-bashkëshortja dhe bashkëjetuesja aktuale.
Arben Ahmetaj akuzohet për korrupsion, pastrim parash dhe fshehje pasurie.
Kujtojmë se ish-zv/Kryeministri po hetohet në mungesë edhe pse ndaj tij ka masë arresti në burg, pasi Ahmetaj nuk ndodhet në Shqipëri që prej Verës së vitit 2023.
Arben Ahmetaj po hetohet edhe për një dosje tjetër, çështjen e njohur si “Buka”, që ka të bëjë me privatizimin e kompanisë së bukës, ku asetet e shtetit dhe te privatëve janë rivlerësuar me çmimet e tregut, sikundër kërkohej nga vendimet e gjykatave në atë kohë.
SPAK thotë se hetimet e deritanishme kanë treguar se Ahmetaj shpërdoroi detyrën duke favorizuar për të privatizuar shoqërinë “Buka sha”.
Ish-zv/Kryeministri Ahmetaj i ka mohuar nga arratia të gjitha akuzat e ngritura ndaj tij nga SPAK.
