Prokuroria e Posaçme kundër Krimit të Organizuar dhe Korrupsionit ka kërkuar pushimin e çështjes ndaj Met Kananit, i arrestuar në Turqi për trafik droge dhe i cilësuar si “Eskobari” shqiptar.
Sipas abc news, SPAK bën me dije se, Kanani për të njëjtin fakt është dënuar edhe në shtetin turk dhe për këtë arsye nuk mund të vazhdojnë hetimet.
Ndërkohë ndaj tij, SPAK vijon hetimin pasuror të nisur nga ish-prokuroria e Krimeve të Rënda në bazë të ligjit antimafia.
Met Kanani akuzohet se kishte ngritur një grup kriminal që trafikonte lëndë narkotike në Turqi-Greqi-vendet e BE dhe Maqedoni-Shqipëri- vendet e BE. Organizata e Met Kananit trafikonte gjithashtu kokainë nga Amerika Latine përmes vendeve të Ballkanit në Shqipëri dhe vendeve të BE-së.
Policia dhe Prokuroria shqiptare njoftuan për goditjen ndaj grupit të Met Kananit në Shqipëri. 18 persona u arrestua, pjesa më e madhe e të cilëve në vendin tonë. Ky operacion është zhvilluar në bashkëpunim edhe me agjenci ligjzbatuese të vendeve të tjera partnere.
Njëkohësisht, SPAK kërkon pushimin e çështjes edhe për tre persona të tjerë, pjesë e së njëjtës dosje penale./Opinion.al
