SPAK ka depozituar sot në Kuvendin e Shqipërisë kërkesën për autorizim për deputetin Sali Berisha për ndryshimin e masës së sigurisë, nga “detyrim paraqitjeje” në “arrest shtëpie”.
Në raste të tilla një deputet mund të hetohet apo përgjohet nga SPAK dhe më pas i dërgohen provat Kuvendit duke kërkuar autorizim për arrestimin e tij.
Prokurorët e SPAK duhet të bindin deputetët e Komisionit për Rregulloren, Imunitetin dhe Mandatet në Kuvend për shkeljet që ka kryer Sali Berisha, për të cilin SPAK, kërkon arrestimin.
Fill pas kërkesës së SPAK, Kryetarja e Kuvendit, Lindita Nikolla, cakton një orar për mbledhjen e Komisionit për Rregulloren, Imunitetin dhe Mandatet.
Tashmë me mbërritjen e kërkesën së SPAK pritet që Kuvendi të përcaktojë datën dhe orën e kësaj mbledhjeje.
Ligji parashikon detyrimin e prokurorëve të SPAK që të paraqesin para deputetëve provat e siguruara ndaj deputetit Sali Berisha.
Në përfundim të mbledhjes, komisioni i paraqet deputetëve të Kuvendit një raport ku përmblidhen pretendimet e palëve.
Pas kësaj, caktohet një seancë plenare ku deputetët votojnë për autorizimin ose jo të prokurorisë për arrestimin e deputetit Sali Berisha.
Edhe nëse Kuvendi e autorizon SPAK-un për arrestimin e tij, ai nuk e humbet mandatin e tij deri në dënim me vendim të formës së prerë përveç rasteve kur e dorëzon vetë.
