Kreu i Aleancës Kuq e Zi, Kreshnik Spahiu ka folur pas incidentit të ndodhur pasditen e sotme në çadrën e PD-së para Kryeministrisë.
Dy persona kanë goditur në kokë dhe fytyrë Spahiun, por ky i fundit tregon edhe për mesazhin që agresorët i kanë thënë në vesh. Sipas tij, sherri ishte organizuar nga kryeministri Edi Rama.
“Isha i ulur në çadër dhe më erdhën dy veta nga mbrapa. Njëri më foli në vesh dhe më tha: Po u more më me Edi Ramën do të q*jmë roptë. Më goditën pas koke dhe më çanë fytyrën. Të dy autorët u larguan me vrap, por ne arritëm të kapnim vetëm njërin prej tyre, të cilin ia dorëzuam policisë”, tha Spahiu
I pyetur për faktin se agresori që ndodhet aktualisht në polici, Flamur Pirraci, është simpantizant i Sali Berishës, Spahiu refuzoi të komentonte, por theksoi se personi i interesuar për incidente në protestën e opozitës është kryeministri Rama.
“Po pse duhet të më qëllonin në çadër? Kush tjetër ka interes? Ngjarja ndodhi në sy të 2 mijë njerëzve, u filmua edhe nga kamerat”, tha Spahiu.
Kreu i AK-së tha se është do të bëjë denoncim në polici për personat që e goditën.
