Kryeministri Edi Rama ka shkuar sot në Kryesinë e Kuvendit ku ka zhvilluar një takim përreth një orë me Ilir Metën. Takimi mbahet në ditën kur Kuvendi mblidhet për të zhvilluar raundin e tretë të votimit për zgjedhjen e Presidentit të ri.
Deri tani janë konsumuar dy nga pesë raunde gjithsej. Nuk ka ende asnjë emër të nominuar për President dhe me gjasë edhe votimi i sotëm do të jetë thjesht procedurë, shkruan Opinion.al.
Mbrëmjen e së mërkurës kryetari i Kuvendit, Ilir Meta, pas takimit me partitë parlamentare (ku nuk mori pjesë opozita) deklaroi se “pavarësisht se maxhoranca ka një shumicë të padiskutueshme të cilësuar, Presidentin duhet ta kemi sa më konsensual dhe në këtë proces të ecim së bashku me opozitën e të kërkojmë konsensusin e saj”.
Ndërkohë pas 3 raundeve të para (të ezauruara), sipas Kushtetutës në dy raundet e fundit, Presidenti mund të zgjidhet me shumicë të thjeshtë 71 vota. /Opinion.al
