Emri i Shqipërisë ka një tingull ndryshe në tryezat evropiane. Kështu u shpreh kryeministri Edi Rama teksa po fliste në konferencën e ambasadorëve, duke iu referuar rolit që ka marrë vendi në shumë organizata ndërkombëtare. Kreu i qeverisë shtoi se në 2030, do të ulemi si të barabartë në tryezën e BE-së.
“Një nga arsyet që na ka ndihmuar që sot të gjendemi në një pozicion krejt tjetër, ku në tërësi kur flitet për Shqipërinë nuk flitet për një vend në hije, dhe ku Shqipëria përmendet në zyrat e politikës ndërkombëtare, është e qartë që ka një tjetër tingull emri i saj. E dimë mirë të gjithë që 2030 duhet të na gjejë në gatishmëri të plotë për tu ulur në tryezën e BE si anëtarë të barabartë të familjes evropiane.
Kjo është detyra jonë, ulja në atë tryezë, është edhe një proces i përmbushjes së kritereve por edhe i vendimmarrjes politike por sa na takon ne është 100 për qind e qartë, ne duhet të jemi gati dhe kjo është më e lehtë ta thuash por më e vështirë ta bësh, sepse kërkon që gjithçka që kemi bërë deri tani, ta konsiderojmë një stad prej nga mund dhe duhet të ngjitemi në një nivel të ri. Për këtë arsye duhet që trupi ynë diplomatik të ngjitet në një nivel të ri.
Sot besoj se është e mundur duke shfrytëzuar një eksperiencë shumë të pasur që ka ky komunitet, shembujt e shkëlqyer që janë përfaqësues të këtij komuniteti dhe duke shfrytëzuar edhe momentin transformues të Shqipërisë”,-tha Rama.
